Poems / कविताए

મહોબતમાં

જરા ય ધ્યાન રહેતું ન અન્ય બાબતમાં,
સમય પસાર થઈ જાય છે મહોબતમાં.

સંબંધ ફેરવાઈ જાય છે પછી લતમાં,
પ્રથમ તો આવવાનું હોય માત્ર સોબતમાં.

પીધા પછી તો બધું પાણી થઈ જવાનું છે,
છતાં ય કેફ છે શરાબમાં ને શરબતમાં.

તમે ય પ્રેમમાં એવી કરી પરીક્ષા કે,
હું ઊભો હોઉં છું જાણે કોઈ અદાલતમાં.

અસંખ્ય આપણી ઈચ્છાઓ હોય છે કિન્તુ,
ફળે તો ફેર પડી જાય કૈં જરુરતમાં.

સમય પસાર થઈ જાય અન્ય બાબતમાં,
જરા ય ધ્યાન રહેતું નથી મહોબતમાં.

Advertisements

Leave a Reply