Vicky Trivedi

પ્રેમ

પ્રેમ

નોંધ : આ લેખ સમજાશે નહિ છતાં વિચાર કરી શકશો તો ચોક્કસ સમજાશે. પણ 100 માંથી 95 લોકો સમજ્યા પછી પણ એના ઉપર વિચાર નહિ કરી શકે કેમ કે માણસ પોતાનો સ્વભાવ ક્યારેય બદલી નથી શકતો એટલે એ ક્યારેય લાલચ છોડતો જ નથી.

આ વિષય ઉપર લખવું આમ તો મને ગમતું જ નથી પણ કોણ જાણે કેમ મારા ઉપર લાસ્ટ બે મહિનામાં ત્રણ ચાર આવા સવાલો કરતા ઇમેઇલ આવ્યા એટલે લખું છું.

***

પ્રેમ એ સાથે રહેવાથી ઉદભવતી એક લાગણી છે. માણસના જીવનમાં એની સૌ પ્રથમ શરૂઆત માના પેટમાં થાય છે. મા એના બાળક સાથે અને બાળક એની મા સાથે રહે છે અને ત્યારે તો ફક્ત એ બે વચ્ચે જ સંબંધ હોય છે. અહી “સાથે રહેવાથી” શબ્દ ઉપર ભાર મુક્યો છે કેમ કે ફક્ત જોવાથી કે સાંભળવાથી કોઈ પ્રેમ થતો નથી. ( જોકે બધાને જોવાથી જ પ્રેમ થાય છે એટલે મારે એ જ સમજાવવું છે કે એ પ્રેમ છે જ નહીં )

લગભગ બધાને કોલેજમાં પ્રેમ થઈ જાય છે. અમુકને તો લવ એટ ફર્સ્ટ સાઇટ થાય. આ આખી વાત જ હાસ્યાસ્પદ છે. એ તો ફક્ત નજરને ગમેલી વ્યક્તિ છે એ આપણા મનને ગમેલી નથી. પ્રેમ ત્યારે જ ઉદભવે છે જ્યારે કોઈ વ્યક્તિ આપણા મનને આપણા દિલને ગમે. અને દિલને ક્યારેય કોલેજમાં બેચ ઉપર બેઠેલી વ્યક્તિ ગમે જ નહીં. જેને આપણે ઓળખતા જ નથી , જેનું ઘણીવાર તો નામ પણ ખબર નથી એ વ્યક્તિ આપણા દિલને મનને ક્યારેય ગમતી જ નથી. એ તો ફક્ત નજરને ગમી છે. જેમ દુકાનમાં કપડાં લેવા જઈએ ત્યારે 100 માંથી એકાદ શર્ટ કે ટી શર્ટ આપણી નજરને ગમે છે. અને પછી વર્ષ કે બે વર્ષ પછી એનો રંગ ઉડી જાય , એનું કપડું ઘસાઈ જાય ફાટી જાય ત્યારે એ જ શર્ટ કે ટી શર્ટ નજરને નથી ગમતી. એ ફેંકી દેવામાં આવે છે. ટૂંકમાં નજરને ગમેલી વ્યક્તિ કે વસ્તુ એ કોઈ પ્રેમ નથી એ એક પ્રકારનું આકર્ષણ છે. અહીં આકર્ષણનો લોકોએ અર્થ ખરાબ કર્યો છે એવો અર્થ ન સમજવો. આકર્ષણ તો કુદરતી છે. કોઈ સાવ અજાણ્યા બાળકને જોઈએ તો એની સામે સ્માઈલ કરવાનું મન થાય છે એનો અર્થ કઈ ખરાબ નથી થતો. પણ એ બાળકથી આપણને પ્રેમ છે એવુ ન કહી શકાય એ ફક્ત આંખોને ગમ્યું છે કેમ કે એનો સ્વભાવ આપણે જાણતા નથી. શક્ય છે એની પાસે થોડા દિવસ દોસ્તી કરીએ તો પછી એ ન ગમે. એ તોફાની હોય કે એ વસ્તુઓ ચોરી લેતું હોય વગેરે વગેરે આદતો હોય તો પછી એ નજરને પણ નથી ગમતું. પણ જો એ જ બાળક સાથે રહ્યા પછી ખબર પડે કે સરળ છે તો એ પહેલાં જેમ જ ગમતું રહે છે. ટૂંકમાં પ્રેમ સાથે રહ્યા વગર ઉદભવે એ અશક્ય વાત છે. અને કોઈ એવો દાવો કરે તો એ તદ્દન ખોટી વાત છે.

એક દાખલો લઈએ. ઘણીવાર એવી વ્યક્તિ પાછળથી આપણને ગમી જાય છે જેની સાથે ઝઘડ્યા હોઈએ. આ બાબતે મને તો સોથી વધુ વખત અનુભવ થયો છે. એક લેખક તરીકે મને આજ સુધી એવી 100 વ્યક્તિઓ મળી છે જેમણે મારી સાથે દલીલો કરી હોય ઉગ્ર બન્યા હોય અને પછી બે મહિના પછી મેસેજ કર્યો હોય સોરી હું તમારી વાત ત્યારે સમજી નહોતી / નહોતો. ખેર બધાને આવા એક બે અનુભવ તો ઓછામાં ઓછા હશે જ. પણ એ ક્યારે શક્ય બન્યું ? સાથે રહ્યા ત્યારે ને ? અહીં સાથે રહેવુંનો અર્થ એક ઘરમાં રહેવું એવો જરાય નથી. ફેસબુક કે વોટ્સએપ ઉપર તમે કોઈ વ્યક્તિ સાથે રહો તો એનો સ્વભાવ જાણ્યા પછી તમને એ ગમવા લાગે.

આનાથી વિરુદ્ધ પરિસ્થિતિ પણ ઉદભવે છે. ઘણીવાર લોકો શરૂઆતમાં તમને કહેતા હોય યુ આર ગ્રેટ, સરસ અને સાચો માણસ છો તું વગેરે વગેરે અને પછી એ જ વ્યક્તિ તમને કહે કે મેં તને સારો સમજ્યો હતો/હતી..! કેમ? કેમ કે એ વ્યક્તિને તમારા માટે કોઈ પ્રકારનું આકર્ષણ જન્મ્યું હતું જે સમય જતાં ન રહ્યું. એટલે એ વ્યક્તિએ તમને જજ કરી દીધા. તમે સારા નથી એવું કહી દીધું. આવા અનુભવ પણ મને તો ઘણા છે. ( એક વાતની સ્પષ્ટતા અહીં કરવી ઘટે કે આકર્ષણ શબ્દનો અર્થ જે તમે કરો છો એવો અર્થ આ લેખમાં નથી. અહીં આકર્ષણ એટલે કે કોઈ વ્યક્તિનું કોઈ પાસું પહેલી નજરે ગમી જાય ) એવું આકર્ષણ ટકાઉ નથી હોતું. એ સમય જતાં ઉતરી જાય છે.

હવે મુખ્ય વાત. પ્રેમમાં લગભગ બધા એમ જ કહેતા હોય છે પેલીએ મને ચિટ કર્યો અથવા પેલાએ મને ચિટ કરી ! એ મને ન સમજી શક્યો / શકી. વગેરે વગેરે આક્ષેપો આપણે સાંભળીએ છીએ. પણ કેમ? કેમ કે એ પ્રેમ હતો જ નહીં. એ ફક્ત નજરને ગમેલી વ્યક્તિ હતી મનને હૃદયને નહિ. અને નજરની પસંદગી ફકત જોવાનું હોય ત્યારે જ સ્વીકાર્ય રહે છે જ્યારે સાથે રહેવાનું હોય ત્યારે મન અને હૃદય નજરની પસંદગીને સ્વીકારતા નથી. મન અને હૃદયની પસંદગી અલગ હોય છે. એ વ્યક્તિનો સ્વભાવ દેખે છે, એનું વર્તન દેખે છે, એ સારું હોય તો જ એ વ્યક્તિ સાથે રહેવું શક્ય બને છે નહિતર ફક્ત કહેવા પૂરતો જ સંબંધ રહે છે. અને એ સબંધ નજરને લીધે ટકે છે પણ છેલ્લે મન અને હૃદય બળવો કરીને એ સબંધ ઉપર પૂર્ણ વિરામ મૂકી દે છે.

આ કિસ્સાઓ કોલેજમાં ખૂબ થતા હોય છે. લગભગ બધાને પ્રેમ કોલેજમાં જ થાય છે ! ( હા હા હા ) હસવું આવે નહિ ? હા એ હસવા જેવી જ વાત છે કેમ કે એ નજરને ગમે એ ઘટના છે હ્ર્દયને ગમે એ ઘટના નહિ. અમુકને તો કોલેનના 1st ડે જ લવ થઈ જાય !!!!! પણ એ લવ નથી એ તો નજરને ગમેલું કઈક દ્રશ્ય છે. હા એ ફક્ત દ્રશ્ય જ છે જેને જોવું જ ગમે છે. એ વ્યક્તિ સાથે રહ્યા પછી કેટલા લોકો છેક સુધી રહ્યા છે ? મેં તો એવો ભાગ્યે જ કોઈ કિસ્સો જોયો છે જેમાં કોલેજમાં છોકરા છોકરીને લવ થયો હોય અને એમના મેરેજ થયા હોય અને ખાસ એ મેરેજ ટક્યા હોય. આવો મેં એક પણ કિસ્સો નથી જોયો જોકે અમુક કિસ્સાઓ એવા બને છે એમાં ના નથી પણ 98% કિસ્સામાં છોકરો અને છોકરી મહિનો કે વર્ષ સાથે રહીને છૂટા પડી જાય છે. કેમ છુટા પડવું પડ્યું ? કેમ કે એ તો બંનેને ફક્ત નજરથી ગમેલા હતા.

હવે એક જુના જમાનાનું ઉદાહરણ લઈએ. એક સમય હતો જ્યારે છોકરો છોકરી એકબીજાને જોયા વગર જ લગન કરતા/થતા. પછી સાથે રહેતા અને સાથે રહ્યા પછી પ્રેમ થતો. પ્રેમ થતો એનું કારણ એ ન હતું કે બંનેના સ્વભાવ એક જેવા હોતા. ત્યારે પણ બધાના સ્વભાવ અલગ જ હોતા પણ ત્યારે બે વસ્તુ બનતી એક તો લગન પછી નિભાવયા વગર છૂટકો જ નહોતો અને બીજું કે થોડો બદલાવ પતિમાં અને થોડો બદલાવ પત્નીમાં સાથે રહેવાથી આવતો. અને એ બદલાવ આવવાની પ્રક્રિયા એ જ પ્રેમ. અને એ બદલાવ નિરંતર આવ્યા જ કરતો અને છેલ્લે સુધીમાં તો પતિ પત્ની એકાકાર બની જતા. એકાકાર મતલબ બંનેના વિચાર જાણે એક જેવા બની જતા. (અપવાદ હતા ત્યારે પણ બહુ ઓછા જેમ કે દારૂડિયા પતિ મળતા ત્યારે એ અશક્ય હતું) ખેર પણ લગભગ ઘણા કિસ્સામાં પતિ પત્ની સુખી જ હતા આજની સરખામણીમાં. અને એટલે જ એ જમાનામાં પતિના મૃત્યુ પછી પત્ની સફેદ કપડાં પહેરતી, બંગડીઓ ફોડી દેતી, ઘરેણાં ઉતારી દેતી. કારણ શું? તમે એમ કહેશો કે એ તો ફક્ત રિવાજ હતો. ના એ રિવાજ નહોતો. એ દુઃખ હતું. આખું જીવન જેની સાથે એકાકાર થઈને જીવ્યા હોઈએ એનાથી અલગ થવાની વેદનાનો એ પડઘો હતો. એ રિવાજ બન્યો જ એટલા માટે હતો કે ત્યારે પતિના મૃત્યુ પછી પત્નીને કોઈ શોખ ન રહેતા…..! (આ વાત ઘણાને નહિ સમજાય) પણ પછી પતિ પત્ની વચ્ચેનો પ્રેમ ઘટતો ગયો. આધુનિક પ્રેમ (આકર્ષણ) જન્મ્યો અને પતિ પત્ની જરૂરત માટે જ સાથે રહેતા હોય એવો જમાનો આવ્યો. (એમાં પણ અપવાદ તો હતા જ ઘણા પહેલાની જેમ જ જીવતા હતા પણ જે મોડર્ન વિચારો આવ્યા એના લીધે ઘણા ઘરમાં પ્રેમ પણ મોડર્ન બન્યો) એમાં એવું થતું કે પતિ પત્ની વચ્ચે વિખવાદ રહેતા અને છતાં ધક્કા મારીને ગાડી ચલાવ્યે જતા. પતિના મૃત્યુ પછી એવી પત્ની બંગડીઓ ન તોડતી, સફેદ કપડાં ન પહેરતી, ઘરેણાં ન ઉતારતી. અને પછી આનો વિરોધ થયો એટલે અમુક સ્ત્રીઓ જેમને સારા પુરુષ મળ્યા ન હતા એ સ્ત્રીઓએ કહ્યું કે પતિ મરી જાય એનાથી કઈ સ્ત્રીને ઘરેણાં ન પહેરાય, રંગીન કપડાં ન પહેરાય એ તો ખોટી વાત છે. એ તો ગુલામી છે. સ્ત્રીની સ્વતંત્રતા વિરોધી છે. આ રીતે ખરાબ પુરુષોથી કંટાળેલી સ્ત્રીઓએ સ્વેચ્છાએ ઘરેણાં રંગીન કપડાંનો ત્યાગ કરવાની રીત ને ખોટા રિવાજ કહીને એને નાબૂદ કર્યા. એનું કારણ ફક્ત એ સ્ત્રીઓને મળેલા ખરાબ પુરુષો હતા જો એ સ્ત્રીઓને સારા પતિ મળ્યા હોત તો આ બળવો ન થાત. આ સ્વેચ્છાને રિવાજમાં ખપાવી ન દોત.

ખેર પણ આધુનિક વિચાર, બદલાવ ત્યારે જ આવે છે જ્યારે કઈક ખોટું થાય છે. એમાં કોઈનો દોષ હોતો જ નથી. પણ એનું પરિણામ બધાને ભોગવવું પડે છે.

આ પ્રક્રિયા ચાલતી જ ગઈ. સારી સ્ત્રીઓ ખરાબ પુરુષના ઘરમાં દુઃખી થઈ એટલે એમણે ફરી નવો વિચાર લાવ્યો કે આ તો હજુ અમારું શોષણ થાય છે. અને અંતે એક દિવસ એવો આવ્યો કે લગન પહેલા છોકરો કેટલું કમાય છે, શુ કરે છે, કેટલું ભણેલો છે, વગેરે વગેરે બધું જ પૂછીને લગન થતા. આ નવી સિસ્ટમમાં થોડાક વર્ષો સુધી છોકરીઓને યોગ્ય પાત્ર મળતા હતા પણ પછી એમાંય પોકળતા આવી. સમાજના એ લોકો જેમને કોઈ કામ ધંધો કર્યા વગર કમાઈ લેવું હતું એ લોકો એજન્ટ તરીકે કામ કરવા લાગ્યા. છોકરા તરફથી છોકરી શોધવાનું અને છોકરી તરફથી છોકરા શોધવાનું કામ થવા લાગ્યું. એ કામમાં પૈસા ત્યારે જ મળે જો સોદો થાય. જો સોદો ન થાય તો એમના ખિસ્સા ખાલી રહે. અને જ્યાં સોદો હોય ત્યાં શુ હોય ? અસત્ય ફક્ત માર્કેટિંગ ! બસ ત્યારથી ચિટિંગ શરૂ થઈ. આ એજન્ટો છોકરાની અને છોકરીની ખામીઓ છુપાવીને સોદો પાક્કો કરતા અને એમ પોતાનું ઘર ચલાવતા. એટલે છોકરો છોકરી લગન પછી અફસોસ કરતા. એટલે ફરી નવો વિચાર લાવવાની જરૂર ઉભી થઇ. હવે શું કરવું તો આપણને સારું પાત્ર મળે? પણ એ પછી કોઈ નવો વિચાર કોઈને આવ્યો નહિ. એટલે એ સિસ્ટમ ચાલતી રહી.

ખેર પણ પછી શિક્ષણમાં એકાએક જ વધારો થયો. શૈક્ષણિક ક્રાંતિ જેને કહેવાય તે સમય આવ્યો અને ભણતી છોકરીઓ અને છોકરાઓ પાસે નવો વિચાર આવ્યો. લવ મેરેજ ! અને શરૂ થયો લવ મેરેજનો દોર. પણ એમાં તો પહેલા કરતાં પણ વધારે કારમી નિષ્ફળતા મળી. લવ મેરેજમાં તો છોકરો અને છોકરી બંને ભણેલા હોય એટલે બુદ્ધિશાળી હોય અને બંને એકબીજાને બનાવી શકે. એમાં એવું જ થતું હતું ખાસ કરીને. ભાગ્યે જ કોઈ છોકરો છોકરી સારા હોય એવા એકબીજાને મળે. એવું હોય ત્યાં ટકતું ખરા પણ મોટા ભાગના કિસ્સામાં સુંદર છોકરી મેળવી લેવા માટે અસત્ય ઉપર પ્રેમ ચાલતો અને લગન પછી એ અસત્યનો પરદો ખસતા જ છુટા છેડા ! આ દરેક બાબતમાં શુ મહત્વનું હતું? “સાથે રહેવું” જ દરેક કિસ્સા માં મહત્વનું હતું. સાથે રહેવાથી જ કાતો પ્રેમ થયો અથવા ખોટા પ્રેમનો ભ્રમ તૂટ્યો. આ પ્રક્રિયા ચાલુ રહી અને પછી મોટા શહેરોમાં અમુક અમુક જગ્યાએ પાછળથી પેલો પરદો ન ખસે એ માટે લિવ ઇન રિલેશનશિપ નો દોર આવ્યો (જોકે આપણા દેશમાં આવું હજુ ખાસ જોવા નથી મળતું) પણ છતાંય એકટર, ક્રિકેટર, એ બધા લોકોમાં આ દોર આવ્યો છે. પણ છતાં એમાંય કશું કાંદા કાઢ્યા નથી. તમે સર્ચ કરજો ઘણી બધી અભિનેત્રીઓએ અને અભિનેતાઓએ લગ્નના દશ કે બાર વર્ષ પછી છુટા છેડા લીધા છે. (સેફ અલી ખાન આનું ઉદાહરણ છે જ એ સિવાય આવા તો 100 એક્ટરોએ છુટા છેડા લીધા છે)

ટૂંકમાં જે પ્રેમ હતો જ નહીં એ સાથે રહ્યા પછી ભ્રમ તૂટી ગયો. આ પ્રક્રિયા સતત ગમે તેટલા બદલાવ લાવવા છતાં અટકી નથી. કેમ કે ફક્ત નજરને ગમેલું હતું. મનને હૃદયને નહિ.

આ તો હિસ્ટ્રી હતી. પણ આનો ઉપાય શુ ?

વેલ , ઉપાય એક જ છે પરંપરાને તોડો. અહીં પરંપરા એટલે કોલેજમાં જાય એ બધા નવા નવા એમ જ સમજે છે કે કોલેજ પ્રેમની શાળા છે. ત્યાં પ્રેમ થાય. અને લગભગ 100 માંથી 90 કોલેજમાં પ્રેમમાં પડે છે. નજરના પ્રેમમાં! અને પછી ભ્રમનો પરદો ખસે એટલે પ્રેમ ગાયબ! કેમ કે એ આકર્ષણ હતું. બીજી પરંપરા છે તૈયાર થવાની. કોલેજમાં બધા તૈયાર થઈને જાય. આ જ તો મૂર્ખાઈ છે ને. પ્રેમને વળી સારા દેખાવાથી શુ મતલબ? એ તો નજરને લલચાવવાનો કીમિયો છે. અને જેમ તમે કૃત્રિમ સારા દેખાઈને સામેવાળી વ્યક્તિને અકર્ષવાની કોશિશ કરો છો તેમ એ પણ એ જ કામ કરે છે. ટૂંકમાં બંને તરફ છેતરપિંડીનો જાણે ધંધો માંડ્યો છે!

ઘણા એવું કહેતા હોય છે કે અમને તો સાચો પ્રેમ હતો પણ અમારા મા બાપ ન માન્યા! અરે તમને તમારા મા બાપે કદાચ રોક્યા હશે પણ આ ફિલ્મોના હીરો હિરોઈન એમને તો ગમે ત્યાં ગમે તેની જોડે લગન કરવાની છૂટ જ છે ને! અરે કરે જ છે ને! પણ કેટલા ટકે છે? (જે સાથે રહીને પ્રેમ ઉદ્દભવવા દઈ પછી લગન કરે છે એ ટકે છે) બાકીના બધા નજરના પ્રેમ વાળા આખરે કોર્ટમાં જ જાય છે !

આ પરંપરા તોડી નાખો કે પ્રેમ આમ જોવામાં ગમતી વ્યક્તિ જોડે થાય. પ્રેમ સાથે રહ્યા પછી જ શક્ય છે એ સિવાય શક્ય નથી જ. એટલે ખોટા આવા વહેમમાં ન રહો કે તમને લવ એટ ફર્સ્ટ સાઇટ થયો છે કે પછી દેખાવડા છોકરા / છોકરીથી પ્રેમ થયો છે! આ પોતાની જાતને છેતરવાનો એક ધંધો છે બીજું કશું જ નથી.

એનો ઉપાય એક જ છે. પ્રેમને ટાર્ગેટ કરો જ નહીં. ફક્ત દોસ્તી કરો. દોસ્તીમાંથી સાથે રહેવાથી લાંબા સમયે પ્રેમ આપમેળે જાગશે અને તો જ એ પ્રેમ ટકશે બાકી તો કોર્ટમાં જ એની પુર્ણાહુતી થવાની!

અને જો સાથે રહીને પ્રેમ વિકસે છે તો પછી એને મજબૂત કઈ રીતે કરવો એ પણ એક માનસિક પ્રક્રિયા છે. એના બે પાસા છે.

1. તમે સાથે રહીને (અહીં સાથે રહીને એટલે કે લગન કર્યા પછી અથવા પહેલા ગમે તે હોઈ શકે) પ્રેમ ઘડયો છે એને મજબૂત બનાવવા જો તમે પુરુષ છો તો….. 1. તમારા સ્વભાવથી અલગ પ્રકારના પુરુષની દોસ્તી ટાળો, તમારો સમય પહેલાની જેમ જ વાપરો, કઈ જ સ્પેશિયલ તમારી પત્નીને ન આપો, કેમ કે એ સ્પેશિયલ સમય કે ગિફ્ટ તમે કાયમ નહિ આપી શકો. અને જ્યારે નહિ આપી શકો ત્યારે એ દુઃખી થશે. દુઃખ શુ છે? દુઃખ એટલે સરખામણી. તમે સારા સમયે તમારી પત્નીને આપેલી જરૂર કરતાં મોંઘી ગિફ્ટ જ્યારે ખરાબ સમયે કઈ ન આપી શકો ત્યારે એ ભૂતકાળ યાદ કરે છે કે પહેલા તો આવી ગિફ્ટ આપી હતી હવે કેમ નહિ? બદલાઈ ગયો? અને પ્રેમ કમજોર પડવાની શરૂઆત થાય છે જો પત્ની સમજુ ન હોય તો. અને એવું જરૂરિ નથી કે પ્રેમ કરતી પત્ની સમજુ હોય. એને વ્યવહારિક બાબતો ન સમજાતી હોય એ પણ સંભવ છે એટલે કૃત્રિમ બધું પહેલેથી જ ટાળો. તમે જે આસાનીથી આપી શકો છો એ જ આપો એને. જે તમે કાયમ આપી શકો એટલું જ આપો તો એ કાયમ ખુશ રહેશે. અમુક લોકો નવા નવા લગન પછી ફરવા જાય અને મોંઘા મોંઘા કપડાં લાવે ને વગેરે વગેરે કરે છે અને પછી જ્યારે એ શક્ય ન હોય ત્યારે મન દુઃખ થાય છે. હવે એ પહેલાં જેવા નથી રહ્યા! આ ઝેર પહેલા હળવું હોય છે પછી જ એ વધારે ઘોળાઈને ફેલાય છે તીવ્ર બને છે. આવું કોઈ કહે ત્યારે સમજાય નહિ પણ જેમના છુટા છેડા થયા છે એ બધા પહેલા તો સાથે જ રહેતા હતા અને એમને એમ જ હતું કે અમે લાઈફ ટાઈમ સાથે જ રહીશું કેમ કે આ બધી વાતો એ સમજ્યા નહોતા.

2. જો તમે સ્ત્રી હોવ તો…… બીજીની સ્ત્રીની લાઈફ સ્ટાઇલ તમારી સાથે સરખાવવાની ભૂલ ન કરો. ફલાણી બધું કરે છે તો હું કેમ નહિ? કેમ કે ફલાણીના પતિને તો ક્યાંક લફરું પણ હશે એટલે એ બધું કરે અને તમારા પતિને ક્યાંય આડા સંબંધો નથી એટલે તમારે તમારી રીતે જ અમુક કામ ન કરવા જોઈએ એટલી સમજ હોવી જોઈએ તમારી અંદર. બીજાની સાથે તમારી જાત, તમારું ઘર, સરખાવશો નહિ તો ક્યારેય તમને કશુંય નવું કરવાની ઈચ્છા નહિ થાય (નવું મતલબ નકામા અખતરા) અને કશુંય નકામું અજુગતું નહિ કરો તો પહેલાની જેમ જ સરળ રીતે આજીવન તમારું ઘર ચાલતું રહેશે…..!

-વિકી ત્રિવેદી

નોંધ : સમય ઓછો હોય એટલે હું જોડણી વગેરે બીજી વાર ચેક નથી કરતો તમારે ફક્ત જીવનમાં કઈક સારું સાચું લાગે એ ઉતારવાનું છે જોડણી નથી જોવાની 😊

Advertisements

Categories: Vicky Trivedi

Leave a Reply